5 години љубов – 5 години „доење со љубов“!
Се сеќавам на првите чекори пред пет години – на големата желба да создадам нешто што ќе биде потпора, прибежиште и топол дом за сите родители што минуваат низ оваа фаза од својот живот, кои се наоѓаат на ова возбудливо и животоменувачко патување. Не знаев каде точно ќе ме одведе оваа идеја, но знаев едно: дека љубовта и поддршката секогаш ќе бидат во срцето на „Доење со љубов“.
Поминаа пет години. Пет години исполнети со стотици средби, разговори, работилници, насмевки и солзи на радост. Пет години во кои растев и јас заедно со сите вас, учев од секоја мајка, од секој татко, од секое семејство кое ми довери дел од својата приказна.
Пет години работа со вас, работа локално со моите семејства од секое ќоше на планетата земја (преку La Leche Liga Deutschland како лидер на мојата интернационална група), и како сертифициран специјалист за доење…
Но, оваа година е особено посебна. Не само што ова катче слави мал јублиеј – 5 години постоење, туку и јубилејно ја прославивме Светската недела на доењето – по петти пат во Македонија. Тоа не беше само настан, туку вистинска прослава на заедништвото, љубовта и посветеноста. Сликите од тие денови сведочат за радоста, топлината и искрените моменти што ги делевме – вистински доказ дека кога сме заедно, можеме многу повеќе. Огромна благодарност на сите учесници и спонзори, особено на Драгана Николоска која имаше прекрасна изложба како дел од настаните, и која целата наша радост и љубов ги овековечи со нејзините прекрасни фотографии.
Кога ќе застанам и ќе погледнам наназад, срцето ми е полно со благодарност. Благодарна сум за секој чекор направен заедно, за секој инспиративен разговор, за секоја мајка што се охрабри да верува во себе, за секое семејство што пронајде поддршка токму тука.
Секој пат го наведувам мојот прв пост, на кој сум бескрајно горда – бидејќи моето катче наречено „Доење со љубов“ во сите овие години остана доследно на иницијалната желба и замисла – да е поддршка на мајките, да е ветер во грбот, да е место каде што се чувствуваат сигурно и иако преку пишан збор, чувствуваат топлина, пријателски пристап, виртуелна прегратка и многу разбирање!
„Оваа страница ја посветувам на сите жени на кои им треба поддршка, кои сакаат навистина да сфатат и да научат нешто повеќе за доењето како процес.
Бидејќи колку повеќе знаеме, толку сме поспремни да се соочиме со секоја ситуација во која ќе се најдеме со новороденчето. Само доколку знаеме што се случува можеме да се справиме со сите стравови, неизвесности и чувства на немоќ. Па кога тие ќе успееме да ги совладаме, ни останува простор за најубавото чувство – љубов.
Од таму и името на оваа страница. Доење со љубов. Без страв од неинформираност, без грижи од незнаење. Единствено со многу љубов.“
И затоа, сакам да ви возвратам барем мал дел од сето тоа што ми го дарувавте изминативе пет години. 🎁
👉 На сите работилници следува голем попуст – како знак на мојата искрена благодарност кон вас.
Од денес, па сѐ до 3 септември, сите работилници како курсот за доење можете да ги следите со 50% попуст:
Код за попуст: DSLJ-5
—
Пред нас има уште многу за патување. Верувам дека наредните пет години ќе донесат уште повеќе моменти на радост, уште повеќе искуства за учење и уште повеќе љубов што ќе нѐ поврзува.
Од срце ви благодарам што сте дел од оваа приказна. Без вас, ова патување немаше да биде возможно. 💜
Со љубов,
Наташа
